Tekst og bilder: Svein Ove Eikenes

AlleMe er eit samarbeidsprosjekt mellom dei tre klubbane Solid, Stord og Trott. Det overordna målet er å bremse fråfallet av barn og unge, og støtta opp under frivilligheita. Det er ulike aktivitetar gjennom året, og kvar haust vert det skipa seminar med ulike tema. I år var «Den gode trenaren» gjennomgangsmelodien i Solidhuset i Sagvåg. Kjekt å sjå at mange av klubbane frå heile Sunnhordland tok turen på en vindfull haustkveld.

Generalsekretær Karl Petter Løkken i Norges Fotballforbund opna seminaret. Han var sentral på laget i dei gode åra i Rosenborg ballklubb og har over 30 landskampar for Norge. Den lune og stødige karen har og ei fin fartstid som direktør ved verftet på Stord. I Solidhuset snakka han om betydinga av å ha gode og berekraftige anlegg. Utan gode anlegg, er det vanskeleg å få til god aktivitet. Det å gi like moglegheiter til gutar og jenter, og ikkje minst kva verdiar ein må arbeide med på alle nivå; både på banen og utanfor, var eit anna sentralt bodskap. Det å vera eit godt førebilete med ein tydeleg karakter var andre perspektiv han trakk fram. Han understrekte óg kor viktig det er å byggja opp under dommaren. Undersøkingar viser at mange dommarar jamt over står i og får for mykje negativ tilbakemeldingar. Her har alle eit ansvar.

Leiar for spelar og trenarutvikling i Norges Fotballforbund, Håkon Grøttland, følgde opp med å vise at topp- og breddefotball (eller utviklingsfotball som han kalla det) heng nært saman. Skal Noreg ta nye steg og kvalifisere seg til meisterskap, er det viktigaste arbeidet det som skjer ute i alle klubbar i bygd og by. Det er her ein finn den nye Erling Braut Haaland eller Caroline Graham Hansen. Til grunn for alt arbeid gjeld det å ha med flest mogleg, lengst mogleg og ha ein sunn og klok tilnærming. Den gode trenaren er ein nøkkel i dette. Barn og unge utviklast og modnast forskjellig og den kloke trenaren ser nettopp dette. Ho legg til rette for utvikling både som fotballspelar, men ikkje minst i det å bli eit godt menneske som kan ha fotballen med seg livet ut. Grøttland viste og korleis fotballforbundet arbeider reint fagleg på landslagsnivå. No er merksemda stor på det å få fram fleire spelartypar med råskap som er avgjerande i begge boksane. Interessant og lærerikt for mange av tilhøyrarane.

Sist ut var spelarutviklar Daniel Andreassen i Hordaland Fotballkrets. På bakgrunn av eiga erfaring som trenar og spelarutviklar, og arbeid i skuleverket, over mange år og på ulike nivå, peikte vossingen på kor viktige dei vaksne er i arbeidet med barn og unge. Alle i og rundt laget er viktige. Tilhøyrsle og sosial tryggleik i grupper og lag – er ein kraft og styrke som kan forløyse mykje godt. Trenarane og lagleiarane er sjølvsagt viktige, men også foreldre og andre vaksne trengst. Jo fleire som er med på å utvikla, trygga og forma unge menneske gjennom viktige år, dess betre utvikling får ein. Relasjonskompetanse og det å kjenna seg sjølv og spelargruppa er grunnleggjande. Dei 5 F-ane var noko som festa seg hos mange i salen: Fotballfaget, Famillie, Fritid, Fortid og Framtid.

Ein fin kveld for fotball på tvers av klubbar.




Den gode fotballkjempen Johannes Belsvik (88 ½ år) var på plass i Solidhuset. – Ein er aldri for gamal for å læra seg noko nytt. Ein kjekk kveld, sa han. Under seminaret fekk han låtten fram hos alle med ein herleg historie frå gamle dagar.